Mambo Ya Kuzingatia Unapoanza Biashara Baada Ya Kuacha Au Kuachishwa Kazi.

 

Wahenga wanasema kila zama na kitabu chake, na hapa Tanzania tumekuwa tunapita kwenye zama mbalimbali, hasa pale tunapobadili viongozi wakubwa wa nchi yetu, nikiwa nina maana ya rais wa nchi.

Tangu tumepata kiongozi mpya wa nchi yetu, kumekuwa na mabadiliko makubwa yanayoendelea kutokea hapa nchini. Mambo mengi yamebadilika tofauti na tulivyozoea. Na moja ya maeneo ambayo yamebadilika sana ni swala la ajira.

Tumesikia na kuona watu wengi ambao wameachishwa kazi (kutumbuliwa), na wengine ambao wameamua kuacha kazi wenyewe kutokana na mabadiliko haya. Sasa swali linakuja, nini kinafuata baada ya kuachishwa au kutumbuliwa kwenye kazi? Je ndiyo maisha yamefika ukomo?

Kwa watu ambao wamekuwa kwenye ajira kwa muda mrefu, ile taarifa tu ya kwamba kazi huna tena, inaleta mshtuko mkubwa. Ni hali ya kusikitisha kwa sababu kitu ambacho mtu alikizoea kinaondoka mara moja.

Lakini haijalishi umeachishwa au kulazimika kuacha kazi, maisha lazima yaendelee. Ni lazima uweze kutengeneza kipato cha kufanya maisha yako yaende vizuri.

Na hapa ndipo unakuja umuhimu wa kuanza biashara. Kama umeachishwa au kuacha kazi mwenyewe, njia mpya bora kwako kutengeneza kipato ni kuanzisha biashara, au kuendeleza kama tayari ulishaanzisha ukiwa bado umeajiriwa.

Lakini kama ambavyo wengi tunajua, biashara zina changamoto zake. Hata kama una mtaji mkubwa kiasi gani, hutaweza tu kuingia kwenye biashara kama utakavyo wewe na ukafanikiwa. Kuna mambo muhimu ya kuzingatia ili uweze kuanzisha na kukuza biashara yenye mafanikio.

Kwa leo tujifunze haya muhimu kwako kuzingatia;

1. Fanya biashara inayoendana na kazi uliyokuwa unafanya.

Kazi ambayo ulikuwa unafanya, kuna mambo mengi ambayo unayajua kwa undani. Kuna vingi unavyovijua ambavyo vitakupunguzia wewe muda wa kujifunza kama utaanza biashara ya kitu kipya kabisa.

Fanya biashara inayoendana na uzoefu ulioupata kwenye kazi ambayo ulikuwa unafanya. Hapa fikiria bidhaa au huduma ambayo unaweza kuitoa kutokana na uzoefu ambao umeupata kwenye kazi uliyokuwa unafanya.

Tumia kila ambacho umejifunza kwenye kazi yako ya zamani, kuweza kuongeza thamani kwa wengine na wao waweze kukulipa wewe.

2. Tumia mtandao uliotengeneza kwenye ajira yako.

Ulipokuwa kwenye ajira, kuna watu ambao ulijuana nao. Watu hao wanaweza kuwa muhimu sana kwenye biashara yako mpya uliyoanzisha. Fikiria kila mtu ambaye umewahi kushirikiana naye wakati umeajiriwa, na ona ni namna gani anaweza kukusaidia au wewe kumsaidia kupitia biashara mpya uliyoanzisha.

Kwa kuweza kutumia mtandao ambao tayari ulikuwa nao, inakupunguzia wewe ugumu wa kuanza na kuendeleza bishara yako. Kila mtu ambaye ulishashirikiana naye kwenye kazi kuna namna unaweza kushirikiana naye kwenye biashara yako. Ni wewe kujua njia hiyo na kuweza kuitumia.

3. Kuwa na matumizi mazuri ya fedha zako.

Kwanza kama una kiasi kikubwa cha fedha ambacho unaanza nacho, unahitaji kuwa makini sana kwenye matumizi ya fedha hizo. Wengi wamekuwa wakitumia fedha nyingi kwa mara moja na kujikuta wakiishiwa fedha huku biashara bado haijasimama. Jua kabisa biashara itahitaji muda kukua na kuweza kujiendesha yenyewe, hivyo kuwa na matumizi mazuri ya fedha zako.

Pili kumbuka sasa haupo tena kwenye ajira, ulipokuwa kwenye ajira, kila mwisho wa mwezi ulikuwa na uhakika wa kupokea mshahara, sasa hivi upo kwenye biashara, hakuna uhakika wowote hasa kwenye swala la fedha. Unaweza kutegemea utauza sana lakini usiuze kwa kiwango hicho. Ili kuepuka hali hii kuathiri maisha yako, hakikisha umetenga fedha kwa ajili ya kuendesha maisha yako ya kawaida.

Kuachishwa au kuacha kazi siyo mwisho wa dunia, bali ni fursa nzuri kwako kuweza kuanzisha biashara ambayo itakuletea uhuru wa kipato baadaye. Yafanyie kazi mambo haya matatu kwenye biashara unayopanga kuanzisha ili uweze kuwa na biashara bora na yenye mafanikio.

SOMA: MBINU MUHIMU ZA KUJENGA MAFANIKIO KATIKA BIASHARA .

Ukijenga utamaduni wa kutembelea mtandao huu kila siku muda si mrefu unakuwa tajiri wa mali, maarifa na afya. Kazi kwako!

Download Video and Put Comment

Toa Maoni Hapa Chini

facebook

twitter

Tweet

google+

linkedin