Habari ya leo rafiki yangu! Ni imani yangu unaendelea vyema. Leo ni siku nyingine muhimu kabisa katika kutimia ndoto. Leo niungane nawe tena katika makala nitakayozungumzia juu ya rasilimali muhimu ambazo Mwenyezi Mungu katupatia kwa usawa binadamu wote.
Tofauti kubwa ya kimafanikio kwa ujumla ipo kwenye namna ambayo kila mmoja wetu anavyoweza kuzitumia rasilimali hizi. Waliofanikiwa wamezitumia kwa kiwango cha juu na hatimaye wakafanikiwa kufikia ndoto zao. Lakini wengi wetu hatujafanya hivyo kutokana na sababu mbalimbali. Duniani hakuna jambo linaloshindikana kufikiwa kama rasilimali hizi zitatumika katika viwango vyake.
Blogu hii niliianzisha nikiwa na kiu ya kutamani kuona kila mtu anaweza fikia ndoto zake. Wazo hili lilitokana na baada ya kuona naishi maisha magumu sana na yenye kuumiza ili hali nikiona wengine wakifurahia maisha. Nikaamua kuanza kutafuata taarifa sahihi wanazotumia wengine hadi kufanikiwa.
Nilianza kuchukua hatua ya kutafiti kupitia kusoma vitabu, makala mbalimbalia kusikiliza audio za watu waliofanikiwa na mwisho nikapata jibu ambalo leo nitakushirikisha kupitia makala hii. Nikiri kwamba bado sijapata matokeo makubwa toka nimeanza kutekeleza yale niliyokuwa nayatafiti ila naona mwanga mkubwa unaoashiria kusonga mbele zaidi, tena ndani ya kipindi kifupi sana.
Baada ya kutafiti na kuona njia ya kupita, niliona ni vyema na mimi nianze kusaidia wengine ili kuona mwanga kama mimi. Natambua na wewe unaandamwa na maisha magumu, maisha yenye madeni, au maisha yasio na furaha, maisha yasio na kipato cha kutosha au maisha duni yasio na tegemeo lolote; wakati huo huo unatamani sana siku moja na wewe uwe miongoni mwa matajiri au watu waliofanikiwa katika jamii.
Sasa acha nisogee mble kidogo; zifuatazo ni Rasilimali kuu mbili nilizozigundua wakati nafanya utafiti wa kwanini wengine wafanikiwe na sio mimi? Hakika Rasilimali hizi ndizo zinazotufanya tutofautiane kwenye kufanikiwa. Na kama na wewe utaweza kuzitumia kwa uweledi mkubwa nakuhakikishia ushindi mnono kwenye maisha yako. Uzuri wa rasilimali hizi ni kwamba kila mtu anazimiliki, hivyo ni rahisi kuanza kuzitumia vyema.
Moja, Rasilimali Ubongo. Kila binadamu ameumbwa na kupewa ubongo ambao ndani yake kuna nguvu kubwa iliyojificha. Kupitia ubongo huo tunaoumiliki tunaweza kufanya kitu chochote hapa duniani. Kinachosababisha wengi wetu hatuitumii vyema hii rasilimali ni malezi tuliolelewa. Malezi tuliyolelewa yanatufanya kuona ukomo wa mambo katika kila nyanja na kwa sababu waliotutangulia waliitumia vibaya hii rasilimali Ubongo, basi na sisi tunaenda kama wao walivyoishi.
Kinachosababisha wengine wakaitumia vyema rasilimali hii na kuwaletea matokeo waliokusudilia ni namna wanavyoweza kuusisimua ubongo ili uwapatie nguvu iliyojificha kwa ajili ya kufanikisha malengo yao. Kama huushughulishi vizuri ubongo wako ili kukuletea njia na ubunifu mbalimbali wa kutatua matatizo yanayokuzunguka ni wazi utaendelea kuwa katiaka gereza la matatizo kila kukicha.
Waliofanikiwa husema nifanyaje kufika pale? Au husema nifanyaje kuweza vile? Lakini wasiofanikiwa husema “siwezi kwa kweli”. Tofauti ya kauli hizo ndizo zinazosababisha ubongo kuamua kutafuta njia ya utatuzi wa tatizo au kuacha kushughulika na suala husika. Ukisema “siwezi” unakuwa automatiki umeuzuia ubongo kutafuta njia za kutatua tatizo lakini ukisema “nifanyaje” ni kauli inaohusisimua ubongo kutafuta jawabu ya matatizo husika.
Hivyo ni vyema ukatambua ubongo wako ni karakana ya kila ubunifu, hii rasilimali ikitumiwa vizuri itatoa mawazo, fikira, na kukujengea mitizamo chanya itakayobadilisha maisha yako. Kumbuka kila kitu unachokifanya kinaanzia ndani kwanza ndipo uthihirisho unafanyika nje. Kwa hiyo ni lazima utambue upo ulipo sasa kutokana na mawazo, fikra na mitizamo iliyochakatwa na ubongo wako.
Ili ufanikiwe vyema kuusisimua ubongo wako na kukuletea mawazo, fikra na mitizamo bora itakayokufanikisha ni lazima uanze kusoma vitabu na makala chanya, pia anza kusikiliza shuhuda za waliofanikiwa mara kwa mara. Kwakufanya hivyo kila siku uwe na hakika utaanza kuuchochea ubongo wako kutoa fikra chanya zitakazo kusaidia kujenga tabia yako, tabia ambayo itaongoza matendo yako.
Epuka sana kuachia ubongo wako kuona, kusoma au kusikia mambo hasi, yaani mambo yanayokuletea hofu, wasiwasi, kujilaumu, kukata tamaa na kurudi nyuma kaa mbali na vyote vinavyochangia hayo. Kwa masaada zaidi epuka marafiki wahovyo, epuka kusoma na kuangalia sinema za hovyo, na epuka kusikiliza miziki na habari za hovyo pia. Ukifanikisha hili utaona utakavyoanza kubadilika.
Mbili, Rasilimali Muda. Hii ni rasilimali nyingine ambayo Mwenyezi Mungu katupatia kila mwanadamu kwa kiasi sawa. Uwe tajiri au masikini wote tuna masaa 24 kwa siku, siku saba kwa wiki. Huwezi kuhonga wala kununua sekunde hata moja. Tofauti yetu kubwa kimafanikio ni matumizi ya muda. Ukitumia muda wako vizuri ni wazi unajenga maisha bora ya kesho kwa sababu Upo ulipo sasa kwa matokeo ya matumizi ya muda wa jana.
Hakikisha kila sekunde inayopita unaitumia kwa umakini, hakikisha unaingiza kitu kipya kulisha bongo yako. Usikubali kupoteza muda kwenye jambo lisilo na maana. Huwezi kuhitaji kuwa mwenye mafanikio alafu unaishi kiholela tu bila kujali muda, kwa kweli utachekesha. Angalia namna waliofanikiwa wanavyojali muda alafu ujiulize kwanini mimi ambaye hata mafanikio sijayanusa nichezee muda?
Rafiki inuka uchukue hatua. Hakuna kipingamizi kitakachokuzuia kuyafikia mafanikio yako kama utatumia rasilimali ubongo na muda vizuri. Chukua hatua mara moja ya kuanza upya hujachelewa, muda ndo sasa ukiamua leo haijalishi una miaka mingapi ni wazi utafanikiwa tu.
Asante kwa kuwa wote katika makala hii. Tutaendelea tena kesho. Usisahau kushare makala hii kwa wengine kwa kubofya vitufe vya mitandao ya kijamii kama vinavyoonekana hapo chini.
Ukijenga utamaduni wa kutembelea mtandao huu kila siku muda si mrefu unakuwa tajiri wa mali, maarifa na afya. Kazi kwako!
Download Video and Put Comment
Toa Maoni Hapa Chini
0 comments:
POST A COMMENT