Stars yamkatisha tamaa Mkwasa

Dar es Salaam. Kocha wa timu ya taifa ya Tanzania, Taifa Stars, Charles Boniface Mkwasa ametaja kasoro zinazoigharimu timu hiyo huku akisisitiza kama hazitorekebishwa kwenye kikosi hicho, hata aje kocha wa dunia bado ataonekana hafai.

Kauli ya Mkwasa imekuja siku moja baada ya Tanzania kuporomoka kwenye viwango vya kimataifa vya Shirikisho la Soka Duniani (Fifa) hadi 160 huku baadhi ya wadau wa soka wakimtupia lawama kocha huyo.

“Siwezi kumzuia mtu kulaumu kusema, lakini kwa Taifa Stars hii hii, hata aje Jose Mourinho, Pep Guardiola, bado wataonekana hawafai. “Stars ikirekebisha kasoro kadhaa, Tanzania itarudi kwenye ushindani,” alisema.

Alizitaja kasoro hizo ni timu kuwa na ratiba inayoeleweka, iwe na muda wa kutosha wa kufanya mazoezi na kucheza mechi nyingi za kimataifa. “Huwezi kunilaumu kwa matokeo ya Stars kwa kuwa siwapati wachezaji kwa wakati, huwezi kumchukua mchezaji leo, kesho akacheze mechi, bora wangekuwa ‘professional’ lakini aina ya wachezaji wa Stars inajulikana, wanahitaji muda kufanya mazoezi pamoja,” alisema.

Kocha huyo mzawa aliyechukua mikoba ya Mart Nooij alidai ligi ya Tanzania inaibana timu na kwamba ligi inatapaswa kuboreshwa zaidi kwa faida ya timu ya taifa.

“Bila hivyo, tutakuwa tunalaumiana kila siku, na kuona makocha hawafai, hata aje kocha gani kwa timu yetu naye ataonekana hafai,” alisisitiza Mkwasa.

Download Video and Put Comment

Toa Maoni Hapa Chini

facebook

twitter

Tweet

google+

linkedin